ಇವಳು ನನ್ನವಳೆಂಬ ಬಲವಾದ ಯೋಚನೆ
ಮೂಡಿತ್ತು ಆ ದಿನ ನೀ ಕೊಟ್ಟಾಗ ಸೂಚನೆ
ಶುರುವಾಯ್ತು ಅಂದಿಂದ ಹಿತವಾದ ಯಾತನೆ
ಮೂಡಿತ್ತು ಕಿರುನಗು ತುಟಿಯಲ್ಲಿ ತಂತಾನೆ
ನೀನಿಟ್ಟ ನೋಟ ಮಾಡಿತ್ತು ಗಾಯ
ನೆಟ್ಟಗೆಯೇ ನಿಂತಿದ್ದರೂ ನಾ ತಪ್ಪಿದ್ದೆ ಆಯ
ಅಲ್ಲೆಯೇ ತಿವಿದಿತ್ತು ಸಣ್ಣದೊಂದು ಭಯ
ಸಿಕ್ಕಿಯೂ ಸಿಗದಿರೆ ಈ ಒಲವಿನ ಜಯ?
ಕಟ್ಟಿತ್ತು ಮನಸು ನೂರಾರು ಕನಸು
ನಕ್ಕಿತ್ತು ಭಾವಿತ್ತು ತುಸುದೂರ ನಿಂತು
ಅದು ಹೂಡಿದ್ದ ಸಂಚು ನನಗೆಲ್ಲಿ ತಿಳಿದಿತ್ತು
ಇನ್ನೂ ಶುರುವಾಗದ ಆಟ ಹಾಗೆಯೇ ಮುಗಿವಂತಿತ್ತು!
ಗೆಳತಿ, ಇದು ನನ್ನ ಕೊನೆಯ ಇರುಳು
ಆದರೂ ಯಾಕೋ ಅರ್ಧ ಚಂದಿರ ಮಾಡುತಿರುವ ಈ ಬಾಳ ಮರುಳು
ಅವನ ಬೆಳಕನಷ್ಟೇ ನಿನಗೆ ಧಾರೆಯೆರೆಯಬೇಕೆಂಬ ಪುಟ್ಟ ಹಂಬಲ
ನಿನಗೆ ಕಾಣದಿರಲಿ ಕಲೆಯಾದ ಅವನ ಗಲ್ಲ
ಬೇವು ನನಗಿರಲಿ ಸವಿ ನೀನು ಬೆಲ್ಲ
ನನ್ನ ಕೊನೆವೇದನೆ ಜೀವನಕೆ ಸಲ್ಲ!
(ಸ್ನೇಹಿತರೊಬ್ಬರು ಕೊಟ್ಟ ಸನ್ನಿವೇಶಕ್ಕೆ ಬರೆಯುವ ಪ್ರಯತ್ನ)
